留德小事 7 - 游水樂

細個嗰陣，媽咪每年暑假都會幫我報暑假班學游水。
雖然，學完好幾年，一路都唔係好叻，
停咗一段長時間，連去游泳落水都驚驚地，
而去旅行周圍玩就更加都冇乜去游水。
其實一路都係因為唔敢放膽去游，或者太緊張……

今年四旬期，我地竟然開始咗一個定期游水既習慣，
每個星期一至兩日去到附近Eberbach既室內游泳池，游大約一個鐘。

剛啱開始既時候，我只會游一半，因為另一半唔到地，
跟著慢慢開始游一個直池，然後一來一回，到今個星期兩次來回(即100米)，
當然第二日好似俾人打完一身嚟咁，成身散晒啦，
但係真係要俾個「叻叻」自己﹗

喺呢邊游水既好處，就係唔係好多人，當然喺講緊呢個室內池啦。
對我嚟講要有心機練習，最起碼唔會游兩步撞到人，唔駛擔心水質問題同皮膚敏感。
其次就係有老公陪我，有時驚水真係最大既致命傷，難得老公又肯喺我隔離同我一齊游。
今日學識游水，我身邊既人真係盡咗好大既努力，好感謝身邊既每一位。
到有一日我能夠完成200米，完成潛水課程，就可以同老公行更遠既路，睇更多風景了。

Image courtesy of winnond at FreeDigitalPhotos.net