入德廚房 食譜分享(2) 德國聖誕曲奇

傳統上德國人喺將臨期間(聖誕前四週)好鐘意一家大細一齊焗Plätzchen。
Plätzchen既定義(根據Wikipedia)為一種偏平、有固定形狀的烘焙食品，於聖誕期間非常受歡迎，
所以不少英文既網頁稱之為︰German Christmas Cookies；德國聖誕曲奇。其網頁冇英文翻譯，有興趣既朋友唯有Google Translate。感覺上呢個應該係享受家庭樂既環節，由搓粉、印模、入爐到上Icing，由三歲到八十歲都可以一齊玩。其實歐洲既冬天成日落雨，天色灰暗，唔喺屋企焗餅仲可以做咩﹖
舊年同前年我都有焗，喺香港嗰陣最大既得益者應該係我個兩歲既兒甥女。
焗咗好幾次都唔係咁OK，一係個粉糰雪得太硬，一係就溶到攞唔起，或者發到脹晒。
直到尋晚終於搵到一個真係得既食譜，攞得起又唔會發得好緊要。
Just found the perfect Plaetzchen recipe on Chefkoch
100g Flour / 100克麵粉
50g Butter / 50克牛油 (切粒)
50g Sugar / 50克糖
1 pinch Salt / 少許鹽
1 Egg Yolk / 一隻蛋黃
雪硬既牛油同麵粉、糖、鹽混合成Crumbles，加入蛋黃後搓成粉糰，於入雪櫃雪30分鐘。
拿出後壓平成若2mm厚，以不同形狀既模印出曲奇。於入已預熱180度既焗爐焗15分鐘。
(以上食譜由Chefkoch網頁直接翻譯而成)

留德思遺 - 1113 巴黎事件

巴黎的恐怖襲擊震驚了整個世界，喚醒了不少沉寂一時的聲音。當大家的臉書紛紛換上法國旗幟的顏色之際，又引來其他各國發生的暴力事件報導。
就在這個關頭，首先別對號入座。身處法國的近鄰，感覺恐怖活動一觸即發，而且就在眼前。假如我還是在亞洲地區居住，又另作別論。
第二，得悉這次事件之後，立即也替身處當地的朋友擔心。
姑勿論那些朋友是否還是感情好得要緊，只要他們平安無事也就安心。
同時也在問︰為甚麼巴黎會成為恐怖襲擊的對象。
跟911不同，美國也許不時都參與其他國家的政治活動，
但印象中法國是懶得理你的國家，人民也是比較關心藝術、音樂那種。好吧﹗後來電台也報導了，是次襲擊為了報復當地報章的嘲諷。(Ref: Je suis Charlie)各種前因後果就不再詳述了。雖然感覺也不知怎的有點「係唔係都認咗先」。
另一方面，巴黎是世界聞名的國際都會，
全球的焦點都集中於此。正正因為這點，也就成為了恐怖襲擊的目標。某人做了甚麼，作過甚麼都只是藉口。無非是有心者想引來更多目光，向全世界展示自己的能力。
相對同日內於世界各地，也發生了不少悲劇。這些事件沒有引起同樣的注意，甚至受到忽視。
生命就是因此而不平等嗎﹖
跨國媒體BBC, CNN等都設專題報導，不斷報導即時情況。
他們對巴黎有特別情懷，我真心覺得很正常，每人都有遠房親戚、朋友、甚至至愛居處當地。
南韓新疆越南等地，歐美當中十個有六七個也不知道事件因由。如果昨天沒有發生這事，今日也不會有人提起這些地方的暴力事件，沒有人發現暴力事件。再者，EU公然接納了因戰爭而逃離家園的平民百姓，又批評了當權者的手法。德國甚至因此而造成社會撕裂，受到其他國家指責，他們還是做了他們認為對的事。結果卻威脅到國家安全，是因為友愛與和平而受到迫害。這個才是值得重視和不公平的地方。
暴力在其他地方發生，不少因由卻是政府的鎮壓。外界報導及評擊往往不是受到限制，就是讓混亂情況惡化。關心世界和平的組織每日都在設法讓更多人知道，他們的宣傳和存在卻從不受重視。現在說甚麼有近火不救救遠火，說甚麼生命不公平﹖真心自問一下，平日有沒有關心一下國際時事﹖這些人憑甚麼去批評報章新聞所謂的「有色眼鏡」，他們最錯只是迎合了讀者的口味罷了。

現在，極端分子向文明宣戰，法國政府的反應很重要，因為這次事件，很有可能引發更多更大型戰爭。法國政府已公開回應極端組織的挑釁，恐怕這樣一來又向新的戰爭走得更近。

留德思遺 - 波蘭朝聖後感

離開波蘭既嗰日，終於有時間坐低同Father歇兩句。
佢問我覺得對今次朝聖有咩感覺。其實我冇準備佢會問我呢個問題，所以我都冇準備好點答。
當時我同佢講︰我覺得今次朝聖…似平時去旅行多啲囉。
我諗佢可能都覺得係，但我冇估到佢會將所有不如人願既問題都歸咎於佢自己。
冇錯，好多人會同佢講今次呢樣唔好，嗰樣可以做得好啲。但， 完美又如何﹖

返到德國靜咗幾日，我好似慢慢感受到今次朝聖背後對我既意義。
由Gdansk走到Wroclaw，成個旅程好似行咗入一個時光隧道咁。
走向獨立建國之前，波蘭既歷史由早於十七世紀已經係戰火連連、甚至四分五裂。
幾百年來呢個國家受到既入侵、瓜分、打壓，竟然對本國既信仰只有正面既影響。
時至今日，波蘭天主教會既地位我相信已經可以話屹立不搖。
客觀原因除咗因為前任既波蘭藉教宗以外，就應該係對信仰鍥而不捨既決心同堅持。
呢樣可能係我對波蘭最深刻既印象。
回顧中國，宗教信仰從來都唔係帶嚟戰事既最主要因素，利益同權力永遠行先。
而可怕既係歷史到今日依然不斷重覆出現，而且完全一模一樣咁發生。
信仰，喺主既名字內，唔通就真係要有咁多人為所帶嚟既災難﹖

再睇近啲，二戰後既波蘭由德國、蘇聯共享。
共產氣氛籠罩下既波蘭，長期受到壓迫，直至團結工會(Solidarnosc)既崛起。
民主之路真係一啲都唔易行，尤其係睇過團結工會既產品之後，
快則十數年，慢則有如中國改革一樣，百年抗戰仍然得個吉。
某程度上我都幾羨慕波蘭，因為就算有Lech Walesa，
團結工會都真係團結起嚟先能夠有所作為，
仲其實加埋好多天時地利人和，佢先可能有今日既局勢。
本來去過睇團結工會，真係對香港前境仲有一線希望。
但話說尋晚瞓唔着又同Ducati討論咗啲歷史背景，又打沉左我喇。
當時波蘭對抗既只係遙遠而瀕臨瓦解既蘇聯政府，
今日既對手除咗係自己政府之外，仲有自己既左鄰右里。
香港，仲未準備好。大眾仲未完全擺脫傳統既生活模式，又未有確實既民主意識。
我地需要更多時間。

講德文化 3 - Michelstadt Odenwald

得閒無聊去隔離Town行下，先發現蜜蜂市集既意義。
喺好耐好耐以前，重重既深山當中，有個細細個既小王國。
嗰度既人住喺一座城堡裡面，居民過著平靜又安穩既生活，士兵日夜都守護著。
有一個風平波靜既晚上，鄰國既軍隊竟然趁夜深時分偷襲。
喺兵臨城下之際，守衛城堡既士兵正呼呼大睡。
情急之際飛嚟一隻小蜜蜂，喺睡死既士兵鼻上針咗一下。
就係咁士兵先由睡夢之中醒起，見到大軍壓境，及時通知其他人。
結果，呢個小王國先能夠逃過一劫。
自此之後，居民為咗紀念蜜蜂及時喚醒侍衛，特別立咗個銅牌喺城牆上，
並每年都舉辦蜜蜂市集，慶祝嗰次既事件。

童話森林果然係童話森林，周圍都係小故事。

留德小事 5 - 學車記

海外地方居住既姊妹通常都有需要考車牌，否則會好似坐監咁。
其實我喺香港考咗一次唔PASS，之後又冇時間考第二次
結果就嚟到德國先考車牌，我覺得都幾難，先講吓程序︰
第一部分︰筆試/理論題
原來，考車唔係買本書返嚟溫，然後走去考咁簡單。
有大約12-14堂理論堂要上，起碼每堂要上一次，(上完唔明可以再上?!)
報名既時候佢通常會俾個Program/App你，裡面有齊嗰年所有試題，
上完堂可以根據當日既Topic做試題，做晒所有試題，做到冇錯就可以去考。
而我上完堂做梗係錯到七彩啦。
第二部分︰其他所須文件 - 急救課程及驗眼證明
根據德國法例，所有人必須喺遇到交通意外必須提供救援。
所以每個考車既人必須要上一堂基本既急救課程，為期一日朝八晚五。
內容同私人公司提供既急救課程應該差唔多，有啲Hea，係咁放Break。
但係當然係用德文啦，承惠35歐，課堂都有幾多，平均每個月有兩次。
最後會攞到一張Cert，證明你有上兼有落手落腳試過。
內容其實都唔係好難，透過身體語言都明七成。
----------------------------------------------------------
至於驗眼，亦都好簡單，十分鐘唔駛。
主要係睇下你睇嘢清唔清楚，會俾你睇唔同既圖案，然後同佢講見到都咩。
原理同平時眼鏡舖好多個E字既圖差唔多。承惠六歐半。
第三部分︰路試
由於我未上，所以我仲未好清楚。
根據佢派既資料，應該會有︰
六堂基本練習 Übungsfahrt
五堂普通公路 Überlandfahrt
四堂高速公路 Autobahnfahrt
三堂夜間行車 Nachtfahrt
一共應該有48個鐘。
基本考題包括︰泊位、掉頭、普通駕駛。
只要做到完成所要求既指令，冇指定路程同方法。

PS: 特別感謝小貝既支持同鼓勵。

留德歌影視 Jurassic World (含劇透)

講德文化 2. Himmelfahrt aka Männerstag 耶穌升天節

耶穌升天節喺德國係公眾假期，咁都有一日假放真係正﹗
(FYI: 耶穌升天節係耶穌死後三日復活咗，第四十日升天。)
呢日名為耶穌升天節，實為德國父親節，或稱男士日。
通常四五月份既呢一日天氣已經回暖，四周圍都綠草如茵，
正值德國最舒服既時候，溫度適中，雨量唔多，
同中國人一樣，呢啲時節最好去登高遊湖，
講真行山、踩單車同遊湖都係德國人最喜愛既家庭活動之一。
難得星期四都有假放，同老婆仔女去戶外活動兼野餐，
呼吸一下新鮮空氣，順便做下運動，曬個日光浴，扮下健康生活好家庭。
(另一方面抱著個小朋友，一面食煙飲酒....個別例子)
仲未結婚既男士，放假冇嘢做，又冇理由同屋企人去咁搞笑吖，
於是就同班Fd去開趴啦。
日頭開趴唔駛去酒吧，一大班人拖著副音響同啤酒箱，行到邊趴到邊。
Ducati幾年前同佢班Fd就特別為呢一日整咗架雙人單車，點解係雙人﹖
因為咁樣飲醉咗都一樣平衡到，加埋後面拖著個音響箱同啤酒箱，想點趴就點趴﹗
為咗玩真係乜都得……

留德小事 4. 圖書館

完咗B2既Course, 有幾日假放下，終於都可以去圖書館睇下。
啱啱搬去Frankfurt既時候，我地登記戶口既時候攞到張Coupon可以免費申請圖書證。
尋日同百合子(日本同學仔)見面，佢同我講正常年費係16歐羅。
坦白講句，我去圖書館既機會只係一年幾次，包括考試前去做Model Test。
嗰度有幾本分咗Level既德文書，不過真係得幾本，而且其實唔係好順路返學。
所以我決定改投進攻Erbach既圖書館，年費十歐費，路程十分鐘，
唯一既問題係佢既開放時間，咁啱係我上緊堂既時間，週末半個鐘都唔開。
呢個就係德國既公眾設施，尤其是喺小鎮；
不過佢地既使用率真係有啲低既，所以開放時間太長就可能涉嫌浪費公帑。

圖書館大約有我地屋企咁大，有半層係兒童書，另外半層係成人，
三行係愛情小說、食譜同手工藝，其餘係歷史同文化書。
而最令我吃驚既係有一整個架係放有關Hessen既書；
而當中七成書係有關本地區Odenwald既歷史同傳說。
雖然上次實習小生話Odenwald既意思係童話森林，但係網上面搵唔到有關既資料，
然後……「嘭」成個櫃都係。
隨意攞起咗一本，內容提到不同既堡壘，不同既地區不同既傳說同歷史。
我地都應該有一份對本地文化同歷史咁誠切既尊重。
超正﹗

留德小事 3. 能源危機

留德思遺 祝我生日快樂

入德廚房 - 飲食文化 2︰德國腸篇

講德文化 - 1. Lärmfeuer 夏令時間開始

有時真係不得不讚嘆德國人尊重及保存傳統和習俗既能力。
今晚半夜時分，德國全國就會將時間調教慢一個鐘，即夏令時間。
估唔到喺Odenwald竟然咁都有得慶祝。＿
Odenwald附近一帶高地不平，山脈連綿不斷，
睇過Lord of the Rings同Game of Throne既朋友就知道︰
呢個時候就係最高既位置點火作為互通消息係最快同傳遞得最遠既方法。
因此，以前啲人(跟據Wikipedia所講，應該係由羅馬帝國既人開始)
喺Odenwald一帶設置多個「訊號站」，以傳遞軍情。
(因為羅馬人喺Odenwald一帶設立邊界，以防衛侵襲)
而夏令時間既開始亦係「軍情」之一，所以會既呢一晚點火。
時至今日，當然似乎變成一個慶祝活動，作為送走寒冬既日子。
本地人除咗喺較高既空地點起火堆外，仲會喺附近鳴炮同鳴槍。
嗰啲已經成百歲以上既炮台，呢個時候就大派用場喇﹗
我地兩個好奇走埋去睇下咩事，其實周圍漆黑一片，咩都見唔到。
呢個時候有個男人主動走埋嚟向我地介紹炮台的大概操作同存放地點。
當時一共有三台炮台，炮台前方已經封閉，所以點火既時候只有響聲。
事實上，佢地有時會整鬼路過啲司機, 趁有車經過既時候鳴炮。
後來佢又提到, 佢地同屬一個小組, 都對炮彈火藥槍械等有興趣及研究,每逢有大小活動有鳴炮需要, 佢地就會到場協助。例如六月將會有一個更隆重既活動，到時會同時點燃多座炮台。
無意中搬咗嚟呢個冇雷公咁遠既地方, 人都唔見多個, 但竟然有咁多歷史同傳統，真係唔簡單。
下次會再講更多有關odenwald既故事。

留德小事 - 2 同勞工處交手︰第一回合

今日特登去「勞工處」，事源是咁的︰早前於Salzwedel-Saschen Anhalt德文班上既同學
很大部份都係由Job Centre轉介過去既，而且係有全部或大部份資助。
我地喺附近(Odenwald)搵過，基本上呢區定期提供既只有至B1既課程，
理由係B1以上課程較少人報讀，德語水平達B1既外地人已經能夠找工作。
事實上都有可能既，但係諗下都能夠想象找到既會係咩工啦。
讀咗咁多年書，唔通真係要做工廠妹過世﹖
所以我決心要讀好啲德文先算，之後搵工又好讀Master又好。
亦即係話我要去到Frankfurt 或 Heidelberg 先可以讀上去，淨係車費每個月二百多歐。
所以我地真係好需要資助。
當然「勞工處」同「入境處」既人就唔會咁順攤啦。
我地入咗個房，同一個姓Schmicht既人傾，我一聽就覺得呢個係假名，
因為咁啱德文融合課程既聯絡人亦都係姓Schmicht，而且呢個名咁普遍。
而後來佢俾我既文件中亦只有姓氏，冇名。
Anyways, 我地同佢講話得B1搵唔到啲咩工，佢即刻就話冇咁既可能。
由佢既眼神睇得出，佢唔會提供啲咩資料。
而佢在乎既，亦只係想係「失業」同「求職」兩個界別中玩數字遊戲，
原來德國既低失業率既咁嚟既﹗
好啦，最後去埋「入境處」都係空手而回，但係職員就似乎友善好多。

入德廚房 - 飲食文化 1︰豬手篇

雖然嚟咗德國已經有一年半，有好多食材/食物已經習已為常。
當然，香港有唔少德國餐廳，燒豬手、黑麥麵包、德國香腸等等大家都唔會陌生。
其實德國唔同既地區都有唔同既著名而傳統食品。
以豬手為例︰
平時德國餐廳供應既係德國燒咸豬手，其實只係德國南部慕尼黑一帶(巴伐利亞地區)既傳統食品。製法大概係將醃至少過夜既豬手烤焗/紅燒，然後將豬手外皮烤或燒至甘香鬆脆。伴菜通常為醃椰菜或稱德國酸菜*，配Kartoffel Knödel* 然後淋上肉汁而成，當然唔少得一杯重量級既啤酒。

剛啱講過燒咸豬手係德國南部既傳統食品，巴伐利亞地區以外比較少見。直至東北方，舊東德地區也有類似既食品，但係就唔係烤或燒，而係煲煮。食法亦都唔係喺Biergarten用嚟送啤酒，而只係家常便飯中既主菜。叫法亦都唔同，燒豬手叫 Grill (Schweine-)Haxe 而東德既煲豬手則稱為Eisbein。東部地區食既豬手，食完剩低既骨頭冬天可以用作溜冰鞋下既刀片，所以名稱同冰(Eis-)有關。伴菜大同小異，都係配德國酸菜，但可能配普通薯仔。

上面提過既德國酸菜Sauerkraut同Kartoffelknödel係德國較普遍既食物。
Sauerkraut
酸椰菜既意思，英語中直接用上德文名稱。即係醃制過既椰菜，酸味比較強烈，而且冇任何油份，啱啱好可以中和豬手既肥膩口感。除豬手外，仲可以配其他唔同既菜色，傳統都係以烤焗既豬肉為主；因為烤呢種煮法需時長，用既部位會選脂肪較多既。酸椰菜係家常配菜，各大超市都有得賣，售價更相當便宜(大約0.5歐就有500g)；自己釀製都可以，但係需時較長，起碼以月份計算。德國酸菜仲有一個特色，就係植物纖維非常多，進食後能刺激腸部蠕動。聽落好似好健康咁，能夠幫助消化同排清毒素。但係，佢其實亦會令腸胃不斷發出聲音，產生氣體(你明我講咩既)。所以酸菜最好經過同葛縷子(Caraway / Kümmel) 一齊煮同埋進食，否則就真係貽笑大方喇。
Kartoffelknödel
或稱Klöße，即薯糰，網上普遍譯為︰馬鈴薯丸子。佢既SIZE普遍比「丸子」大，同酒釀丸子比應該大20倍以上，所以個人應該丸子有點表達唔到佢既真面目。「糰」會令人諗起飯糰，大細差唔多，功用亦都有相似之處。薯糰係作為主糧(Side Dish)之一，做法大約係用煮熟既薯仔打碎，同麵包碎混合加上牛油和蛋。通常係超市有Instant Mix，返屋企根據指示煮就得；或者亦有即食既，喺超市既凍櫃通常都會搵到。

留德小事 - 1 郵差送不到 警察上門尋

事情是咁的︰
早上11點鐘正在飽受飢餓困擾既時候，突然門鐘響起。
打開門見到包租婆已經喺樓下開著大門同一位(女)警員講緊嘢。
我正準備落樓梯既時候發現︰自己仲係著住條熱褲，正想轉身換衫既時候佢已經叫著我喇。
佢不停咁話冇咩事既，唔駛緊張。
原來又係因為信箱上面既名。
其實成件事都幾CONFUSING既。
由中學開始一直都用開同一個英文名，教會、公司、Facebook、舊Blog都係用英文名
所以喺外國介紹自己都係用返同一個名，
包租婆當然只知道我英文名啦，所以信箱原本都係寫我既英文名既。
問題係我既戶籍登記、銀行、保險係用護照既名，即中文譯名。
所以，我地一定要重新再寫多次個名喺個信箱度。
Ducati一開始就拍晒心口啦，因為屋企冇Label又冇膠紙，而佢做嘢嗰度係有既
咁呢件事就拜託咗Ducati做，Label佢好明顯就攞咗成個月都唔記得，
終於都貼好咗，點知第二日落雨，就化開晒嚟。
就係咁信箱上面依然冇我地個名……
直至今日，保險公司報稱寄信寄唔到俾我，所以警察就上門調查喇。
估唔到有晒地址，只係少咁個信箱上面既名，都會寄唔到。

入德廚房 敗作Plätzchen

留德思遺 - 惡夢

午夜夢迴，夢到一個最唔想見到既人，就嚇醒咗。
張開眼睛，眼前人仲係Ducati老公，個心都定啲。
每次見到呢個影子，我就成個人好似被捲入一個無底既黑洞裡面，
我覺得嗰段黑暗既日子，仲係追著我咁，點都擺脫唔到。
有時候我望著Ducati，仍然覺得有啲唔真實，好似發緊夢咁；
我怕有一日我會夢醒，發現呢一切都係假既。

亦都係因為咁，我以後都唔會行差踏錯，
又可能因為咁，我對唔公平既事亦更加鄙視。
偏偏，呢個世界就係有咁多唔公平既事發生。
前兩個星期，中大校長在「校長網誌」為正義發言。
我覺得好感動，社會上既矛盾絕對唔係因為年齡背景既相距
而係因為好多人根本就唔想醒覺，自古有云︰識時務者為俊傑，
日子過得輕鬆，搞咁多事做咩﹖呢個就係問題所在。
有好多人醒覺，但係見唔到前路，見唔到將來。
所以，嚟到2015年第一個月份過到最後，我的新年願望︰
我要自強，按照真理和正義，做我認為啱既事，遇到唔啱既事就要據理力爭。
只有咁做呢個世界先會少啲唔公平既事。
「生於亂世，有種責任」

留德好天氣 - 落雪

落雪喇﹗落大雪喇﹗一朝早就落雨，連雨帶雪落咗成個朝早，終於都落出雪。
尋日去咗附近既樹林玩雪，堆完雪人，掟完雪球，返到屋企咩雪都溶晒。
今日終於又落喇。
由當初地上濕淋淋咁，到後來遍地都係白色，感覺係咁特別。就好似仲係聖誕節咁。
喺屋入面開著暖爐望出去，心入面覺得特別踏實同溫暖。
如果呢啲地方，國家福利唔好，窮人冇瓦遮頭，日子真係會好悽涼。
但係，今日睇嚟氣溫仲未夠凍，雪落到地上就溶喇。

我呢啲南方人，狂風暴雨就見得多，漫天飛雪就真係頭一次見。
原來，冰天雪地既日子，都唔想出門口；
遍地白色既風象，係要乎合好多條件先會出現；
仲有原來，雪係飄落嚟，而唔係落落嚟既。
真係大鄉里。

留德思遺 - 我的九型人格

入德廚房食譜分享 - Brownies

啱啱返到嚟德國，Ducati一直都努力工作，早出晚歸。
講得好聽啲佢怕我一個人喺屋企悶，講得難聽啲之唔係唔抵得我得閒囉。
於是佢呢兩日就係咁問我︰你會唔會焗蛋糕過嚟俾我地﹖
終於尋日就焗咗個Brownie過去，網上搵到兩個簡單好用既食譜︰
第一個係嚟自Shirley@原味生活的食譜。
材料︰

• 10 tablespoons unsalted butter, cut into ½-inch slices
• 1¼ cups pure cane sugar
• ¾ cup natural unsweetened cocoa powder
• ½ teaspoon fine-grain sea salt
• ¼ teaspoon baking powder
• ½ teaspoon espresso powder or very finely ground coffee (optional)
• 2 cold large eggs
• 1½ teaspoons vanilla extract
• ⅔ cup white whole wheat flour (or flour of choice)
• 2 ounces dark or semi-sweet chocolate, roughly chopped (or ⅓ cup chocolate chips)

港德大不同 - 婚禮籌備篇 2 - 豬手國辦證(結婚)

多得「飛德高飛德遠」既小貝教路，先能夠順利完成。
但係到落手落腳去搞嗰陣，都仲係有時會遇到一啲奇怪既問題。

1. 首先，準備要於德國結婚之準新人(無論男女)，最好等入境後才向政府部門入紙申請排婚期。否則入境處查到，係有可能遭拒絕入境，因為德國並不准許為結婚而入境的。
解決辦法︰於入境之後才開始辦理，但由於德國政府出名手續煩覆兼費時，如果持著旅客簽證，極有可能不夠時間。如是者，如果持有其他長過三個月既簽證會比較好。

居港留德歌影視 - 蘭陵王

勢估唔到，緃橫歌影視界多年，今日竟然「敗倒」俾一套國產既蘭陵王﹗﹗已經睇咗差不多三次，仍然係好想再睇落去，真係冇得救﹗天啊﹗點解﹗

(以下故事內容轉為書面語，因為小妹睇既係普通話版本)
故事背景︰時藉為魏晉南北朝後期，北齊和北周間之歷史發展。蘭陵王乃北齊既皇室之後，精通戰術，以保衛國家、實現天下太平為己任。所謂「生於亂世，有種責任」是為蘭陵王之座右銘也。(四爺，你可以生於今日之香港嗎﹖) 由其衍生出一段多角戀情，為故事注入不少枝節及轉捩點。原則上主角為二人︰高長恭、楊雪舞，然後其他男角都在楊雪舞身邊轉來轉去，而女角就在高長恭身邊轉。

劇評︰情理上其實確有不少地方是說不過去的，還有更多穿崩的地方，當中有不少卻都是制作及拍攝問題。然而，雖然此劇乃合中港台三地之作，當中已經是揉合了不少現代之價值觀，但從這些電視劇中，總免不了一些迂腐守舊之概念，尤其是感情觀。
蘭陵王和周國皇帝都是王，蘭陵王一直很保護自己既女人，係好愛，但就冇令佢好好發揮，一展所長，亦都冇好好利用佢既長處，只係娶佢返屋企做花樽，將女人當做女人。反觀周國皇帝，佢宣才女上朝，為佢打下基礎，幫佢站穩陣腳，幫佢發光發亮，咩都同佢一齊商量。愛既表達因人而異，蘭陵王是典型既大男人，做咩都喺自己心裡面決定，唔會同其他人商量。所以最後，女主角不斷咁懇求佢咩都要一齊面對，好吧，結果女主角就以同樣既方法還返俾佢，然後就犠牲喇。雖然我以前曾經講過，冇料到就唔好做大男人，但係我宜家先發現原來有料到既大男人，我都係唔係好受得。愛情係應該雙方平等，然後大家一齊在愛情和相處之中，一齊成長、發展同改變。當然，呢啲始終喺現代人既想法，古裝片係唔可能發生既。
故事情節其實係好一般，都係好容易估到既發展。全劇主要係頭幾集好睇，後面鄭兒戲份多咗之後，就變得唔好睇喇。我諗大部份網民都會咁諗，係因為鄭兒既性格同其餘角色全然不同，喜愛睇蘭陵王既戲份，當然就唔會鍾意睇鄭兒，加上後半既故事實在同其他古裝劇一樣千篇一律，實在白白浪費喇。反觀開頭部份的確係緊張刺激，節奏非常緊密；描寫情愛之處也特別深刻，很明顯係融合咗台灣偶像劇既原素，為觀眾帶嚟戀愛既感覺。因此，主角二人既甜蜜片段，實在係令人再三回味。呢個可能係呢套古裝劇既成功之處。當然，亦都可能係因為演員既努力同演技啦。

選角︰雖然係咁，思前後想都係唔係好明自己做咩睇完再睇。
曾經以為係因為男主角馮紹鋒，所以去搵其他佢拍過既戲︰鴻門宴嚟睇，戲中佢飾演項羽，的確霸氣十足，但係就唔能夠專心欣賞，實在係太悶喇﹗而且都過唔到電，所以好明顯係唔關個演員事，而係因為蘭陵王呢個角色。再睇埋佢卸下古裝之後個裝，其實同其他大陸演員一樣咁俗，(呢點可能係要歸咎於內地既形象顧問。)。的確，包裝係好重要既﹗呢個角色，性格、身份都非常討好，加上馮紹峰輪廓分明，菱角甚多，而且佢本身既演技的確係非常好，配合適量打扮就打造咗呢個引人入勝既電視劇。
(其實除咗個樣，佢完全係唔似一個武將，根本就係全身都冇半點肌肉既公子哥兒。)
再數安德王、宇文神舉、鄭兒、高緯、甚至楊仕深等人選角都非常不錯。
令我百思不得其解既，係究竟點解會搵陳曉東做宇文邕。
佢個樣係咪小朋友咗啲呢﹖

後記(發嗡瘋)︰
由細到大都好鍾意睇武俠小說，但係金庸啲武俠小說主角都好風流，經常拿唔定主意要邊個女主角。比較好既只有蕭峰、楊過，或者仲有好幾個角色，但係在金庸筆下都很不成氣候，不是英年早逝，就是與世無爭的懦夫 (對，楊過，是說你)。我能夠明白當中既原因係當時主流既讀者都係由父系社會既框架長大既普羅大眾，英雄一貫既作風為國事為重，兒女情長既都係等閒之輩。而且當時社會鼓吹專心工作，拉緊褲頭，總有出頭天既精神，大家都專注怎樣從黃毛小子躍身成為群雄之首，邊有心機諗埋男女私情﹖

仲有重點︰人與人之間既信任，並不是單憑片面之詞，而往往是透過二人朝夕既相處同了解，由然而生的。各位唔好再自我沉溺喺呢啲「你一定要信我﹗」既虛言，因為人天生有多面，至於對誰利用邊一面，邊個知﹖回想過去廿載睇過既電視劇，又有邊套唔係將啲咁
最好笑係，裡面既角色都係聾聾地既，冇人認出主角把聲，一次又一次因為四爺帶著面具而蒙混過去，真係冇眼睇。