講德文化 - 游水二三事

俗語有云︰各處鄉村各處例﹐之不過德國既規矩就特別多，去游個水都有規定。
初初嚟到德國既朋友要注意以下幾點，避免不必要既誤會喇。

德國既泳池有室內亦有室外。
室內游泳池叫Schwimmhalle, Badehalle, Hallenbad等等，



大部分都係室內恆溫，冬天正常開放。
室外游泳池叫Freibad，並唔係唔駛錢既意思，只係室外開放咁解，所以係喺炎夏開放。
德國室外游泳池既最大特點係有草地樹蔭，附有沙地排球或足球場，甚至小食部。
池中有玩樂設施如瀡滑梯及噴水裝置，邊沿有大量淺水區供人休憩。
夏天既時候，我地去泳池都去得幾密，就算係唔落得水既日子，
帶埋地鋪去曬個太陽，喺草地上樹蔭下睇下書，食個雪糕都唔錯。
小食部啲嘢食同超市價格差唔多，可以稱得上係抵食。啤酒薯條熱狗均有發售。
(我地呢邊六點後仲有半價，天又未黑，入去仲可以玩多個零兩個鐘﹗超讚﹗)

收費處如果係用機器，咁請自備零錢，真係冇的話可以搵職員問下有冇得找散。
一次半次佢冇咩嘢做既話都會肯既。

如果有指示男女更衣室喺邊就冇咩問題啦。
如果冇既話就表示係男女同用啦，都唔會尷尬，因為喺更衣室係有獨立間隔。
首先入去之前你應該會通過人手或電腦分配到一個儲物櫃，
入到去就會見到有好多間巷，指示儲物櫃既位置(通常只係有編號)，
搵到啱嗰條巷之後就會先經過更衣既位置，直到目前為止你都可以着著鞋。
更衣間通常有兩邊門，鞋襪一般要喺更衣間內除掉，
經過更衣間之後，無論去儲物櫃或洗手間，就只能赤腳或著乾淨既拖鞋。

落水之前要先沖身，香港都有好多人會咁做，雖然係會好凍，但係衞生好多。
而喺德國係一定要咁做﹗落水之前要先沖身﹗好重要所以講多次。

Thermalbad亦係德國非常受歡迎既，即係扮溫泉。
呢邊啲「溫泉」普遍都係以保健為題，唔少都有水中運動既課程，
亦有室外暖水池，接連室內部分，完全唔怕會凍親。
不少設有另費既桑拿房，同按摩服務。
冬天煙雨迷濛既日子，暖水池就係德國人週末既Hae點。