留德小事 6 - 學車記 (續)

終於都可以自己楂車出街。

首先講下上堂︰
可能佢唔知我啲德文點，所以佢有等我考完筆試先學。
老師真係好好，頭一堂有用英文同我講嘢，等我冇咁驚。
喺德國楂車我覺得好唔同，成日都要記著Right before Left。


車速既變化好大，經常50km/h去到100km/h，上高速公路建議130km/h。
但係住宅區又普遍限30km/h，某部份只限10km/h。
(我記得喺香港楂極都係三波大約50-80km/h)
同埋佢地好注重路面流動，你仲學緊都好，去到要開100km/h既地方請照開100km/h。
去到十字路口請記著邊個有優先權，輪到你既話就行，唔好等；
未輪到你佢讓你都唔准開，尤其是考試嗰陣。
直到老師覺得你READY，就會幫你睇幾時考試，通常喺一個月內通知。

然後講埋點考路試︰
老師會同平時一齊坐喺隔離，佢腳底下同你一樣有三個腳制。
腳制，尤其是中間既剎車制連接著一個警告系統，
如果老師需要踩剎車制，考試車即告終。
考官會坐喺右邊後座，首先佢會問你一兩條基本問題，然後先會開車。
途程佢同老師一路吹水，到時到候會同你講行邊條路。
行咩路其實係睇考官心情，泊車、掉頭等都係睇心情同彩數。
時間大約30-45分鐘不等，同時都係睇考官心情。
以老公既小徒弟為例，佢考咗15分鐘都冇。

第一次考試開車唔夠五分鐘就肥咗，原因有好多，但我知唔係因為我唔識楂。
案發時候，年輕既考官好輕鬆咁同老師吹水，
由於之前嗰晚瞓唔着，又(因為老公要去睇醫生) 特別早起，
所以佢地吹水期間我有啲遊魂。
到我回魂嗰陣發現考官望著，就即刻自己嚇自己，(因為當時冇望外鏡)
跟著佢話迴旋處第二個出口出，我先醒起佢同我講緊嘢，
跟著我就諗︰咩話﹖第三個定第二個話﹖
呢個時候老師就踩咗剎車，因為迴旋處有架車由左邊嚟緊，
而我個位其實俾個車框擋著咗睇唔到。
SO SHIT!! 就係咁樣肥咗，真係好唔抵。百幾歐十分鐘就冇咗﹗
好在唔駛排多幾個月，老師就幫我定咗三四個禮拜之後。
呢次我反而緊張好多，手腳都震晒，但係就好小心，結果平安度過。
佢仲問我到底上次衰啲咩，衰咩吖，衰白痴囉……