居港歌影視 - Exodus Gods and Kings

10月11月兩個月得閒到爛屐都冇入戲院睇過一套戲，一踏入12月就套套都想睇﹗
影評我已經冇寫好耐，(Prof.) Thomas Lee 教落要寫低自己既思緒，先可以更清晰有條理同有邏輯咁思考。

今日同文姐去咗APM睇出埃及紀。
卡士︰
荷里活好明顯咁係以Christian Bale做招徠，吸引一班非教徒同影迷，策略是很不錯。
當然，佢既演技同靈活度都無可置疑；而佢既名氣由Batman之後一直有增無減，直到今日無人不知無人不曉。多年前其實佢已經拍過好多部都算幾出名既電影，可惜一直都係做白臉小生，公子哥兒等角色實在冇咩發揮。然而，佢都好適合做亦正亦邪，甚至有精神病既角色。
所以對我嚟講，佢會係同Moses大纜都扯唔埋既人物之一。
另一個超級大卡士就係Sigourney Weaver，惡害母后既角色，真係好啱佢。
其餘既我都唔係好識，只係得Joel Edgerton (Rhamses)有啲面善，佢呢個大帝輕佻狂妄得嚟，有一種好特別既感覺，好有英國貴族既感覺，rather than 法老王。
之後仲要讚一讚Ben Kingsley，佢真係做咩國藉既角色都好似，天生既恩賜，無計﹗
總括嚟講，成個setting 都係歐美人面孔，埃及以色列佈景，靚就幾靚，不過有點commercial。

內容︰
「梅瑟五書」中既出谷紀係一段非常精彩既一部書。
當然兩個幾鐘係冇可能描述晒成部書既內容，不過以改編劇本嚟講，佢都跟得幾足，重要既片段都有齊，而且都用比較自然既手法表達出嚟。其實我好怕以前拍出谷紀既電影電視，都好鐘意將越逾節嗰段拍得好神化，好似鬼片咁，有一道光穿梭於大小街道，殺害家中長子。
電影中很多地方都有簡略交代事情發展既前因後果，聖經當然係冇架啦，所以睇聖經其實係睇得一頭霧水，不明所以來，但係劇本加咗好多起承轉合，包括︰佢點知自己既身世﹖佢點解會由宮殿中走到去曠野當中，預見佢既妻子﹖佢點解會俾天主揀選作為帶領以色列人既領袖﹖點解法老王會接見佢，同佢對話﹖(香港嗰幾件人仔，佔領街道兩個月，絕食到幾乎冇命，都冇人肯接見佢地囉。頂﹗事隔三千幾年喇﹗呢啲唔係大倒退係咩﹗) 仲竟然有對頭幾大天然災害既科學分析﹗真係估佢唔到﹗所以佢可以講一句，當地係一個文明既地方﹗(當然都有唔文明既時候，包括求神問卜既情節)
而紅海一幕係最離譜既一段。
紅海並冇突然分成兩半，露出中間旱地，冇「水在他們左右好像牆壁」。而卻成為咗一種自然現象︰退潮。但係就有海水湧回旱地，成為巨浪淹沒埃及人既戰車，場面依然好壯觀，並一如無線劇集既橋斷，兩個企喺海中間既主角安然無恙咁游返上岸，而其他已經徹退緊既軍隊就全部罹難……此為敗筆。
阿郎同若蘇厄都分別成為大配角，得兩三句對白。阿郎仲完全唔知梅瑟有天主照著咁款，第一個質疑佢咁。若蘇厄戲份比較多，佢親眼見到梅瑟同天主講嘢，但係佢又見到唔天主，所以只係見到梅瑟同空氣講嘢，比著我，我可能會懷疑佢只係精神病，加埋Christian Bale既外型仲似﹗(佢既FANS請多多原諒! )
而亮點係天主。我覺得呢個天主同我認識既天主比較相似，呢個係我覺得比較高興既事。我心目中既天主係一個好堅定既天主，但同時佢都俾好大既自由度俾人類，佢俾人好多opportunity去選擇，做，定唔做，係人揀，唔係佢安排。同時，佢亦比較能夠接受人有唔同既意見，有唔認同佢某啲旨意既時候，即使係咁，天主揀選既人依然會跟著天主即旨意去做。呢個係新約當中，能夠感受到既天主；舊約當中，對天主既描述相比之下係以堅定同有威嚴既。有時我唔係好明，天主點解會相差咁大﹖按照電影中既描述，我比較容易理解。同時，寫劇本既人亦真係有深入去探索天主既神髓。
PS: 身為「黃絲帶」，佢講既嘢其實都幾啱而家香港既Situation。
尤其是同總督既一席話，真係好啱駛，如果香港既政治界有一個半個咁既人物，我走都走得安心好多。唉。