入德廚房 - BB焦

德國既夏天，是完全屬於燒嘢食既季節。

喺香港熱點等都等到秋天，天氣冇咁熱又冇咁濕先去燒嘢食啦。而印象中想去燒嘢食，通常都好大陣仗咁去買炭、買燒烤叉、買蜜糖、買食具等等，仲要最好有人得聞早啲去霸爐，透埋爐咁就最好；又或者去燒烤場既，就山長水遠咁去到，但有人開爐提供埋爐具同食物；
當然可以搵到朋友住村屋，天台後院有得燒就最正。燒到咁上下啲小朋友又熱又悶，可以行開行埋搵嘢玩，大人就圍埋一齊吹水，又唔怕俾人趕。食嘢香港人梗係食啲貴夾唔飽既嘢啦，鮑魚青口生蠔乳豬咩都燒得，加埋最後嗰個腐竹雞蛋糖水，真係冇得頂。

嚟到德國啲人只要夠暖可以喺戶外活動，就係啱燒嘢食既季節。通常大部份家庭都有自己既燒烤爐，圍埋坐喺後院露台度，女士就去準備沙律飲品同餐具，男士就圍埋一邊飲啤酒吹水，一邊攞著既燒烤鉗燒嘢食。 食物包括(豬)扒、腸、各款串燒…仲有扒、腸等等。(=.=' 到底我做錯咗啲咩會搬咗過嚟德國﹗orz)

但唔好以為佢地唔係好鐘意燒嘢食所以冇咩變化，其實德國人夏天最受歡迎既家庭社交活動就係燒烤同露營，每星期既超市減價貨品就好似只有燒烤食品。起初覺得真係好煩，點買餸煮飯呢﹖但自從買咗個燒烤爐之後，我地得閒就燒，平時放工後又可以燒，週末冇咩嘢做又可以燒。除咗唔駛煮飯所以好爽之外，亦因為今年冬天特別長，到咗六月尾都冇咩點熱過，只要天氣好就一定唔會錯過曬太陽既機會；兼且老公話佢可以一邊喺車房整嘢，我又可以喺附近一邊吹水一邊煮嘢食咁話喎。(冇錯﹗我既工作範圍係包括其他老公嗰份﹗老公話佢唔識燒喎﹗>.< )