留德小事 - 8 黑暗中的晚餐

幾年前第一次聽到喺香港有Dialogue In The Dark。之前去Hamburg已經想去睇下，不過冇咩時間鬆動，所以冇去。終於喺生日嗰陣，老公送咗呢個晚餐俾我。多謝老公﹗
Book既時候，老公話好full，要Book到六月，結果呢個WEEKEND先去。

位於Wetzlar市中心既Dunkelkaufhaus，並不屬於Dialogue Social Enterprise GmbH，即係同香港或Hamburg既Dialogue In The Dark一啲關係都冇。Dunkelkaufhaus似乎係純屬當地商業及志願機構合辦既社區活動。而由於主辦單位主要由盲人及弱視者團體組成，所以所有活動完全以黑暗做主題。他們舉辦既活動真係好多樣化，除晚餐外另設有葡萄酒品嚐、早午晚餐下午茶、生日派對、Speed Dating等等，真係出乎我地意料之外。
開始既時候有人講解流程，參加者可以選擇兩人一張枱，或四個人一張；同其他人一齊似乎好玩啲，所以我地同另外兩個人一齊坐。首先我地手拖手由一位侍應生帶著我地去到一張枱坐低，佢同我地講話俾每人有一個水杯，一套餐具，枱上有兩支水等等，然後佢就去準備上菜。
當晚我地揀既係三道菜既餐目，
由廚房傳嚟第一道係見面禮，一件細細件既Frikadeller。
嗰頭食完侍應已經嚟到身邊，準備收執，然後仲同我地講︰之後會一道比一道難架﹗
閒聊咗一陣後，就已經傳來陣陣既香味，仲有人大叫︰湯﹗
我地估咗好耐係咩湯，同枱既女士話係忌廉湯，我都認同係，應該係蔬菜類既白湯。至於係咩材料就真係估左好耐，我以為係洋蔥，而老公就覺得係西蘭花。最後答案原來係薯仔忌廉湯，原來越基本既材料就越難估。
輪到主菜我地已經等得好心急，遠遠已經傳嚟肉汁香味，加上刀叉互相碰撞既聲音，短短幾分鐘好似過咗好耐咁，上菜既時候我地仲以為吉列豬扒加磨菇汁，侍應話完全唔係嗰回事。食落發現又真係估錯晒喎，係燉肉配豆角烤薯。其實都幾好味，啲肉燉得勁霖，到底佢地點樣可以燉得咁霖呢﹖但係有啲肥，同估咗好耐以為係豬肉，答案原來係牛肉。
喺上甜品之前，竟然仲有現場音樂，因為到目前為止仲未有聽覺上既體驗。喺黑暗中既演唱，每粒音都非常清楚，而且聽落啲歌詞好似有啲唔同咁，可能係從來都冇咁專心咁聽歌啩。甜品係莓類乳酪之類，我地諗著可能係紅莓，答案係草莓﹗
好啦，我發現我既味覺都唔係好敏銳。