坐咗個半鐘頭火車出Frankfurt睇Jurassic World。好少咁激動一上畫就去睇。
有樣野我嚟到都好堅持既係睇戲要睇原聲，配音硬係唔夠真實。

而由於佢唔係上咗好耐，所以原聲只有3D版，結果局著去買貴飛，

貴到行過隔離個市集都唔想買嘢。
初頭睇到張poster已經覺得好奇怪，搞咩整個男主角大特寫? 

睇完明咗，

成套戲個賣點都喺佢身上，講到佢好似萬能咁，

人地成條team攞著重型武裝就全軍覆沒，但佢同女主角拎著支獵槍隻身走入去，

冇事走返出嚟?? 女主角仲勁，着著長裙加豆零踭去追恐龍。

我都想問佢對鞋喺邊度買。

其實我睇完覺得個故事唔係好合理，點會最後所有剩餘既恐龍咁合作無間架﹖OMG

不過算啦，睇恐龍電影仲有啲咩理性可言﹖

我只係覺得可惜咁好既主題，可以再發揮更好，

情節可以更緊張刺激，場面都可以更震撼囉。

是日德文堂講到能源危機。
呢個係世界各地都非常關注既議題。同學當中有位來自伊朗既記者。佢上星期差唔多成個禮拜冇返，到咗今個星期就好似謝晒皮咁，老師都表示擔憂。但係今日一講到能源，佢就突然間好熱衷咁發言。
從佢既眼神同反應可以睇得出，佢同佢既國民都因為石油而深受痛苦同折磨。我呢啲滿口大仁大義既網民當然係表示同情同諒解啦。跟著佢又再三強調開發石油對環境造成嚴重污染，並間接表示任何其餘既能源開發都比提取石油好。
講真一句，嚟到德國我先真係知道點先有能源危機既意識。就算平時買餸都會諗過度過啲蔬果肉類由邊度運嚟，用咗幾多碳用量等等。我地喺香港平時諗都唔諗，想食咩就食咩，仲越遠越好，新鮮由外地空運到港最好。商場一年四季都開大個冷氣，反正用得越多越抵用。對能源危機簡直係視而不見，聽而不聞，對石油國既情況更加毫無概念。只能話我地仲係停留喺淨係識得賺錢既階段，而目前又的確有更切身既問題需要解決嘅，但同時都希望有更多人關心呢個全球性既問題啦。

日前收到家姐同媽咪寄嚟既包裹。
收到既竟然係毛冷。
我同家姐講，我其實唔知係我既生日禮物，定係暗示叫我織多幾件冷衫俾大孖細孖同小魚。哈哈。
小妹由細到大都幾鍾意織嘢同勾嘢，不論繩結， 頸巾，冷衫都浪費咗我唔少青春。
我既暑假通常都喺毛冷堆同武俠小說中度過。
可惜阿媽從來都冇咁既時間同耐性將佢既修行傳授俾我。
所以其實我只係識織啲好基本既嘢，冷衫去到領口同袖口我就會企咗喺度。
直到宜家有咗internet 同YouTube我先有機會識唔同既嘢。
而又因為唔知點解英美同澳洲都有不少教學既Video，而且非常清楚。
反觀中港台咁既video 真係少之又少，就算有都唔係好清晰。
搞到我宜家淨係知啲英文既Terms。
由YouTube 學返嚟既包括:
BB帽仔，牛仔boots, 勾針套，鞋仔同手袋。

而生日嗰日就返咗奶奶度。話說Ducati 話要同我慶祝生日，又兼且唔知邊個話要嚟個婚禮後既after party，所以就運晒啲Video同相返去俾啲Guest睇。

前一日ducati 就開始擔心，因為個party既搞手除咗奶奶之外仲有一班同ducati 由細玩到大既兄弟，ducati 驚佢地唔知會安排啲咩。原來佢地安排咗碌樹俾我地鋸。初頭有人俾咗把超鈍既鋸俾我地，鋸極都鋸唔開。持有人話係佢嫲嫲所擁有!! 唔好再舊啲! 到後來先有人攞咗把利啲既鋸嚟，先叫做有啲進展。期間主持人細東同鈍鋸持有人不繼灑啲沙同啤酒上去，等啲沙撻晒喺啲鋸齒之間，就更加難鋸開。最後都搞咗十分鐘有多! (我地已經諗著惡搞呢兩位兄弟) 

之後又玩咗好幾個遊戲，都係啲Guest發起既。值得一提既係係我終於見識咗德國特有既超長生日歌。喺香港都算大大舊既我又俾人抬高，今次只係得兩位壯士，仲連埋櫈一齊枱!! 真係OMG!!! 其實我係有畏高架!

最後班佬搞到三點幾先話走。鈍鋸遞咗杯vodka 溝Cola俾我，飲咗兩啖，好似飲緊火酒咁。之後Ducati 車咗我返屋企再車班佬走，後來佢同我講班佬唔係返屋企，而係轉場去人地(大東)屋企繼續飲，所以搞咗勁耐。

呢個話題本來上次寫豬手之後就已經想寫，諗著着筆之際發現Facebook有人又寫咗
撞咗Topic真係唔好意思，但係反正我地寫既內容都唔係好相同，所以決意都係寫
反正我個Blog都冇咩觀眾.......ANYWAYS.
香腸喺德國既飲食文化當中遇見既指數甚高，幾乎達90%，除非你食素啦當然。
講到香腸連我都覺得德國絕對比起任何一個國家都講究，而且種類亦非常多。

1. Bratwurst

外型︰

長條型，未煮嗰陣可以清楚見到肉碎同脂肪既分佈，攞上手軟冧冧，有腸衣包著，
通常同其他鮮肉一齊放喺雪櫃。
一睇就知一定要煮先食得，仲經常都驚死佢唔熟，煎完仲切開睇下佢係咪熟透。

成份︰
肉類方面通常有註明係豬肉、牛肉定係雜肉。
食法︰

睇名就知佢係要煎香或(燒)烤先可以食。
通常喺屋企或餐廳會配薯仔同酸菜食，燒烤就梗係配麵包、沙律、茄汁同燒烤汁啦。

喺德國既大小市集、大型活動、遊樂場、甚至大街上都有流動小販或小食店賣。遇見既機會高達百分之一百。呢種腸澳紐都有，比起德國見到既更軟更血淋淋，騒味比較濃，可以有羊肉。

2. Bockwurst
外型︰

長條型，屬於Brühwurst一種，即製作時用上煙過既肉，甚至短暫用水煮過。

因此佢不需要腸衣，依然喺室溫下保持原狀，同我地喺香港見慣既豬肉腸一樣，呈淺啡色，用玻璃樽裝著。
食法︰

可以即時食用，當然加熱過會比較安全。

3. Leberwurst
外型:
直譯為豬肝腸，實質我會叫佢做豬肝醬。
大部份係以玻璃樽裝著，有一層白色既脂肪喺面層，顏色應該係灰色，亦有粉紅色既。自製既以灰色居多，但亦有部份廠製既呈粉紅色，以膠盒或膠囊裝著。
成份:
以豬肝為主，可能加入其他內臟，以及香料攪碎而成。面層脂肪係來自肝臟同其他內臟，而非特別用入嘅。
食法:
用嚟搽麵包食。
註: 此物膽固醇同脂肪含量非常高，唔建議經常食用
本人從來都唔食內臟，但都會食豬肝醬，內臟味唔算好濃烈，其實加埋香料都幾好味。

4. Mettwurst
外型:
冇固定形狀。
但你一定見過，同免治豬肉一樣樣。但Mettwurst通常係新鮮既免治豬肉，聽聞係有監控過。通常會另外註明mettwurst, 同普遍用嚟煮既肉碎(btw, 嗰啲叫Hackfleich)區別開嚟既。喺鮮肉櫃檯買既通常係一大盤，上前可能有洋蔥同其實香料放喺度，你要幾多就磅幾多俾你。亦有啲係喺普通雪櫃度同其他腸放埋一齊，呢啲就係長條型，外加膠袋包裝好既。
成份:
攪碎咗既生豬肉。
食法:
搽麵包食。
本人認為呢個絕對係搵命駁，同超越心理關口之舉。一直以來都係話豬一定要煮到好熟先食得，因為豬肉入面有好多居生蟲。但我食咗，而食落又幾好味。感覺好奇妙，生既肉係冇咩特別味，而且通常都已經加入鹽同胡椒，有時仲有洋蔥，所以咩味我真係答唔上。試過咪知囉。
當然，普遍德國人會揀啲睇落四正啲乾淨啲既地方買啦。

5. Rotwurst

外型︰

用玻璃樽裝著，顏色呈深紅色，間中有啲白色一粒粒既嘢散落係當中。

其實佢係豬血醬，同英國既Black Pudding同類，應該味道唔係好同，但係我冇食過Black Pudding。

成份︰

豬血加煮熟既碎豬肉或其他內臟。

食法︰

凍食- 搽麵包食。

熱食 - 當正餐配薯仔食。(又名︰Tote Oma)

對我嚟講唔係好恐怖，因為我間唔中都食豬紅，但煮熟咗之後個名就好恐怖，意思係「死去既祖母」……食落都可以接受…唔去諗咁多既話。我估德國都唔係好多人好鍾意食囉。

6. Weißwurst

外型︰

長條型，有腸衣包著，腸衣應該係唔食得，食咗唔會有事，不過咬唔爛。

佢係白色，有時會有綠色一點點，係香料嚟。

成份︰

豬肉同香料

食法︰

當早餐食，加甜芥末配啤酒同Brezel/Pretzel。

傳統Bavarian早晨全餐。